البرررررررررد

البرد جاي السنة دي غريب جدا و عنيف جدا و شرس جدا ، عندي دور برد مستمر معايا لاكتر من شهر متواصل ، بنجاح ساحق ماحق ، الاعراض هي نفس الاعراض المعروفة ، ارتفاع درجة حرارة الجسم ، مع الاحساس بالبرودة ، والصداع احيانا ، والهمدان ، والكحححححة ، والرشح ، كل الاعراض دي موجودة ، ولا تنقطع او تخف حدتها ، ولولا ارتباطي بالشغل كان زماني راقد في السرير طول المدة دي ـــ بصراحة استسلمت للرقاد مرتين خلال اسبوعين متواليين كل مرة حوالي ثلاثة ايام ، ودي برضه اول مرة تحصل ـــ الشئ الغريب اني رغم طول المدة اللي لازمني فيها البرد المرة دي ، ورغم خنقنتي من الكحة الخنيقة المتواصلة ، ما فكرتش خااااااالص اروح لدكتور ، ليه ؟ مش عارف

لكن برضه انا جربت اكتر من وسيلة للعلاج ، يعني استهلكت علبتين دوا كحة مختلفتين عن بعض ، ( توسكان ) و ( توسينور ) كل واحدة منهم كانت وصفة من صيدلية ، واستهلكت حوالي خمسة كيلو ليمون مغلي لوحده ، وليمون مخلوط بالشاي الاحمر ، واستهلكت اوراق حوالي اربع شجيرات جوافة صغيرة برضه مغلية في الماء ، و برطمان عسل اسود كبير كنت باشرب منه معلقتين يوميا علي الريق ، وحوالي اتنين كيلو اعشاب طبية مش عارف بالضبط مكوناتها ايه ( بصراحة كده يعني ) ، و اتنين كوب جنزبيل ساخن قاومت طعمه الغريب اللي هو خليط من الطعم الحريف جدا الشبيه بالشطة والحارق للزور والطعم المسكر اللزج السميك القوام بصعوبة ، ده غير شرائط الفلورست والكيتوفان لزوم الرشح والصداع وخلافه

كل ده ولسة البرد صامد ومكلبش في جسمي مش عايز يطلع والكححححححة مش عايزة تروح ، لغاية بجد ما اتخنقت ، ومش عارف اعمل ايه ؟
2 Responses
  1. تعمل اللى المفروض يتعمل من زمااااان وتروح للدكتور يا استاذ .. حيوفر عليك وقت ع الأقل

    وألف سلامة وطهور إن شاء الله


  2. david santos Says:

    Excellent post.
    Have a nice day